Cuirfidh BBC 1 Thuaisceart Éireann tús le sraith nua teilifíse d'fhoghlaimeoirí anocht ag 10.45pm, Colin & Cumberland.
Beochan é an tsraith nua arb iad Colin, fear, agus Cumberland, a mhadadh, an bheirt phríomhcharachtar ann. Tá Colin i ndiaidh dul a chónaí in Aberant agus gan de chuideachta aige ach Cumberland.
Murab ionann agus mórán madadh eile, áfach, is comrádaí confach é Cumberland. D'aonturas, tá na cláir thar a bheith gairid; maireann an ceann is faide cúig nóiméad agus níl ach nóiméad amháin i gceist leis an chuid is mó eile.
Blaiseadh den teanga (nó bleaist i bhfianaise gheáitsí Cumberland) atá i gceist. Beannachtaí, nathanna agus ceisteanna beaga a thabhairt don fhoghlaimeoir go hiomasach (agus go greannmhar) an cuspóir atá ann.
Tá suíomh Idirlín (www.bbc.co.uk/ni/colinandcumberland) beo anois, áit ar féidir le duine cluichí a imirt agus focail a fhoghlaim.