AGUS É ag freagairt ceisteanna sa Dáil an tseachtain seo caite, shéan Aire Stáit na Gaeltachta, Dinny McGinley, líomhaintí Pheadair Thóibín (SF) go raibh an Rialtas ag tarraingt na gcos maidir le feidhm a thabhairt don straitéis 20 bliain don Ghaeilge, a scríobhann Seán Tadhg Ó Gairbhí.
“B’fhéidir nach bhfeiceann an Teachta é go léir. Tá sé cosúil le iceberg – ní fheicimid ach an pointe a ghobann amach ón uisce, ach tá go leor de faoin uisce,” a dúirt McGinley.
Is minic sochtheangeolaithe cloiste againn ag déanamh imní faoin dul chun cinn atá á dhéanamh ag an Rialtas maidir le feidhmiú na straitéise, ach b’fhéidir gur ag éisteacht leis na saineolaithe mícheart atáimid. Seans gur chóir dúinn fios a chur ar mhuireolaí nó oigheareolaí an chéad uair eile go mbeimid buartha faoin teanga a bheith ag dul go tóin poill?
Nó ar chóir?
D’athraigh McGinley cúrsa ina dhiaidh sin agus tharraing meafar ní ba neamhurchóidí ná meafar an chnoc oighir chuige féin chun Tóibín a chur ar a shuaimhneas.
“B’fhéidir go bhfuil sé cosúil le lacha – tarlaíonn níos mó faoin uisce ná mar a bhíonn le feiceáil os cionn an uisce. Is fíor é sin a rá chomh fada agus a bhaineann sé leis an Roinn agus le straitéis na Gaeilge,” a dúirt McGinley
B’fhéidir mar sin gurb éaneolaí seachas oigheareolaí is fearr a thabharfadh tuiscint dúinn ar an obair dhiamhair atá ar siúl maidir le cur i gcrích phlean an Stáit don teanga?
Pé acu é, bhí galar na meafar tolgtha ag Peadar Tóibín ó Dhinny Lacha faoin am seo. “Cheap mé go raibh an tAire Stáit níos cosúla le heala ná lacha, ó thaobh an méid oibre atá á dhéanamh aige faoin uisce,” arsa fear Shinn Féin.
Níor baineadh cleite as McGinley, áfach, agus thug le fios go raibh plean forfheidhmithe trí bliana á ullmhú ag a Roinn a thógfadh ar an bplean forfheidhmithe do 2011 a foilsíodh anuraidh.