Colúnaí leis an Irish Times, Alan Titley, a bhuaigh Iriseoir na Bliana ag Gradaim Chumarsáide Oireachtas na Gaeilge i nGaillimh Dé hAoine.
Déanann na gradaim seo ceiliúradh ar an obair atá ar siúl in earnáil na cumarsáide Gaeilge trí aitheantas a thabhairt d’aisteoirí, iriseoirí, láithreoirí agus lucht déanta clár.
Bláthnaid Ní Chofaigh a bhuaigh duais ar son a cláir sheachtainiúil, Bláthnaid Libh ar RTÉ Raidió na Gaeltachta; ba é Rónán Mac Aodha Bhuí ó RnaG a bhuaigh Craoltóir Raidió na Bliana agus bhain Síle Nic Chonaonaigh an gradam do Chraoltóir Teilifíse na Bliana as a cuid oibre ar Dúiche ar TG4.
Thug Magamedia dhá ghradam leo as Sraith Teilifíse na Bliana, EIPIC, agus as Scannán/Clár Teilifíse na Bliana, Deoch an Dorais.
Thóg Meangadh Fíbín an gradam as Gearrscannán na Bliana le Snámh in aghaidh Easa. Bronnadh Aisteoir na Bliana ar Tara Breathnach as a cuid aisteoireachta i Máthair i Maidhm.
Dhá ghradam a bronnadh ar TG4 as láithreán gréasáin agus ba é stáisiún Bhaile na hAbhann a bhain Buaic-Ghradam Cumarsáide an Oireachtais as a bheith 20 bliain ar an fhód.
An tUachtarán, Micheál D. Ó hUiginn a bhronn na gradaim. Dúirt stiúrthóir an Oireachtais, Liam Ó Maolaodha, gur mhór an onóir go raibh an tUachtarán i láthair agus “TG4 ag ceiliúradh 20 bliain ar an bhfód. Bhí ról lárnach ag an Uachtarán i mbunú an stáisiúin agus thug sé tacaíocht do na meáin Ghaeilge agus na healaíona i gcónaí.
“Tá na gradaim seo mar chuid lárnach d’fhéilire sóisialta na meán Gaeilge agus déanann siad ceiliúradh ar an tionscnamh sláintiúil mar a fheicimid inniu í”.
