Ba é “Gaeloideachas do Chách” téama na comhdhála a bhí ag an Fhoras Pátrúnachta i mBaile Átha Cliath Dé Sathairn.
Phléigh lucht na comhdhála ábhair éagsúla a bhain leis an earnáil: airgeadas scoile; cosaint sonraí, agus meon scoile san áireamh.
Bhí príomhoidí scoile, baill de bhoird bhainistíochta, ionadaithe ó earnáil na Gaeilge agus ón earnáil oideachais i láthair.
Thug an Coimisinéir Teanga, Rónán Ó Domhnaill, óráid ag tús na hócáide, á rá go raibh cur chun cinn na Gaeilge ag brath go mór ar an chóras oideachais agus go raibh sé i gceist aige béim bhreise a chur air sin.
Mhol sé do lucht na nGaelscoileanna a gcearta teanga a lorg.
Dúirt ardrúnaí an fhorais, Caoimhín Ó hEaghra, go raibh “slua breá i láthair le haoichainteoirí den scoth agus is léir ón aiseolas atá faighte againn gur bhain gach ar tháinig a lán tairbhe as an méid a bhí pléite”.
Fógraíodh buaiteoirí Chomórtas Ealaíne an Fhorais Phátrúnachta, comórtas atá urraithe i mbliana ag Foras na Gaeilge.
Dúirt Ó hEaghra go raibh caighdeán na n-iontrálacha an-ard agus go raibh duaiseanna ar nós táibléid, fón póca agus Wii buaite ag na daltaí.
